[Back to Fitt 9]

Fitt 10

780 Giuuitun im thô eft an Galilealand | Ioseph endi Maria,
781 hêlag hîuuiski | heb=encuninges,
782 uuârun im an Nazarethburg. | Thar the neriondio Krist
783 uuôhs undar them uuerode, | uuarð giuuitties ful,
784 an uuas imu anst godes, | he uuas allun liof
785 môdarmâgun: | he ni uuas ôðrun mannun gilîc,
786 the gumo an sînera gôdi. | Thô he gêrtalo
787 tuuelib=i habde, | thô uuarð thiu tîd cuman,
788 that sie thar te Hierusalem, | Iuðeo liudi
789 iro thiodgode | thionon scoldun,
790 uuirkean is uuilleon. | Thô uuarð thar an thana uuîh innan
791 thar te Hierusalem | Iudeono gisamnod
792 mancraft mikil. | Thar Maria uuas
793 self an gisîðea | endi iru sunu habda,
794 godes êgan barn. | Thô sie that geld habdun,
795 erlos an them alaha, | sô it an iro êuua gibôd,
796 gilêstid te iro landuuîsun, | thô fôrun im eft thie liudi thanan,
797 uueros an iro uuillion | endi thar an them uuîha afstôd
798 mahtig barn godes, | sô ina thiu môdar thar
799 ni uuissa te uuâron; | ac siu uuânda that he mid them uueroda forð,
800 fôri mit iro friundun. | Gifrang aftar thiu
801 eft an ôðrun daga | aðalcunnies uuîf,
802 sâlig thiorna, | that he undar them gisîðia ni uuas.
803 Uuarð Mariun thô | môd an sorgun,
804 hriuuig umbi iro herta, | thô siu that hêlaga barn
805 ni fand undar them folca: | filu gornoda
806 thiu godes thiorna. | Giuuitun im thô eft te Hierusalem
807 iro sunu sôkean, | fundun ina sittean thar
808 an them uuîha innan, | thar the uuîsa man,
809 suuîðo glauuua gumon | an godes êuua
810 lâsun ende lînodun, | huô sie lof scoldin
811 uuirkean mid iro uuordun | them, the thesa uuerold giscôp.
812 Thar sat undar middiun | mahtig barn godes,
813 Krist alouualdo, | sô is thea ni mahtun antkennian uuiht,
814 the thes uuîhes thar | uuardon scoldun,
815 endi frâgoda sie | firiuuitlîco
816 uuîsera uuordo. | Sie uundradun alle,
817 bihuuî gio sô kindisc man | sulica quidi mahti
818 mid is mûðu gimênean. | Thar ina thiu môdar fand
819 sittean under them gisîðea | endi iro sunu grôtta,
820 uuîsan undar them uueroda, | sprac im mid ira uuordun tô:
821 `huuî uueldes thu thînera môdar, | manno liob=osto,
822 gisidon sulica sorga, | that ic thi sô sêragmôd,
823 idis armhugdig | êscon scolda
824 undar thesun burgliudiun?' | Thô sprac iru eft that barn angegin
825 uuîsun uuordun: | `huuat, thu uuêst garo', quað he,
826 `that ic thar girîsu, | thar ic bi rehton scal
827 uuonon an uuilleon, | thar giuuald hab=ad
828 mîn mahtig fader.' | Thie man ni forstôdun,
829 thie uueros an them uuîha, | bihuuî he sô that uuord gisprac,
830 gimênda mid is mûðu: | Maria al biheld,
831 gibarg an ira breostun, | sô huuat sô siu gihôrda ira barn sprecan
832 uuisaro uuordo. | Giuuitun im thô eft thanan
833 fon Hierusalem | Ioseph endi Maria,
834 habdun im te gisîðea | sunu drohtines,
835 allaro barno bezta, | thero the io giboran uurði
836 magu fon môdar: | habdun im thar minnea tô
837 thurh hluttran hugi, | endi he sô gihôrig uuas,
838 godes êgan barn | gadulingmâgun
839 thurh is ôdmôdi, | aldron sînun:
840 ni uuelda an is kindiski thô noh | is craft mikil
841 mannun mârean, | that he sulic megin êhta,
842 giuuald an thesaro uueroldi, | ac he im an is uuilleon bêd
843 githiudo undar thero thiodu | thrîtig gêro,
844 êr than he thar têcan ênig | tôgean uueldi,
845 seggean them gisîðea, | that he selb=o uuas
846 an thesaro middilgard | manno drohtin.
847 Habda im sô bihalden | hêlag barn godes
848 uuord endi uuîsdôm | ende allaro giuuitteo mêst,
849 tulgo spâhan hugi: | ni mahta man is an is sprâcun uuerðan,
850 an is uuordun giuuar, | that he sulic giuuit êhta,
851 thegan sulica githâhti, | ac he im sô githiudo bêd
852 torhtaro têcno. | Ni uuas noh than thiu tîd cuman,
853 that he ina ob=ar thesan middilgard | mârean scolda,
854 lêrian thie liudi, | huuô sie scoldin iro gilôb=on haldan,
855 uuirkean uuilleon godes. | Uuissun that thoh managa
856 liudi aftar them landa, | that he uuas an thit lioht cuman,
857 thoh sie ina cûðlîco | ankennian ni mahtin,
858 êr than he ina selb=o | seggean uuelda.
[Fitt 11] [Fitt index]