[Back to Fitt 11]

Fitt 12

949 Sô sprac thô iung gumo | bi godes lêrun
950 mannun te mârðu. | Manag samnoda
951 thar te Bethania | barn Israheles;
952 quâmun thar te Iohannese | cuningo gisîðos,
953 liudi te lêrun | endi iro gilôb=on antfengun.
954 He dôpte sie dago gihuuilikes | endi im iro dâdi lôg,
955 uurêðaro uuillion, | endi lob=ode im uuord godes,
956 hêrron sînes: | `Heb=enrîki uuirðid', quað he,
957 `garu gumono sô huuem, | sô ti gode thenkid
958 endi an thana hêleand uuili | hluttro gilôb=ean,
959 lêstean is lêra'. | Thô ni uuas lang te thiu,
960 that im fon Galilea giuuêt | godes êgan barn,
961 diurlîc drohtines sunu, | dôpi suokean.
962 Uuas im thuo an is uuastme | uualdandes barn,
963 al sô he mid thero thiodu | thrîtig habdi
964 uuintro an is uueroldi. | Thô he an is uuilleon quam,
965 thar Iohannes | an Iordana strôme
966 allan langan dag | liudi manage
967 dôpte diurlîco. | Reht sô he thô is drohtin gisah,
968 holden hêrron, | sô uuarð im is hugi blîði,
969 thes im the uuilleo gistôd, | endi sprac im thô mid is uuordun tô,
970 suuîðo gôd gumo, | Iohannes te Kriste:
971 `nu cumis thu te mînero dôpi, | drohtin frô mîn,
972 thiodgumono bezto: | sô scolde ic te thînero duan,
973 huuand thu bist allaro cuningo craftigost.' | Krist selb=o gibôd,
974 uualdand uuârlico, | that he ni sprâki thero uuordo than mêr:
975 `uuêst thu, that ûs sô girîsid', quað he, | `allaro rehto gihuuilik
976 te gifulleanne | forðuuardes nu
977 an godes uuilleon'. | Iohannes stôd,
978 dôpte allan dag | druhtfolc mikil,
979 uuerod an uuatere | endi ôk uualdand Krist,
980 hêran heb=encuning | handun sînun
981 an allaro baðo them bezton | endi im thar te bedu gihnêg
982 an cneo craftag. | Krist up giuuêt
983 fagar fon them flôde, | friðubarn godes,
984 liof liudio uuard. | Sô he thô that land afstôp,
985 sô anthlidun thô himiles doru, | endi quam the helago gêst
986 fon them alouualdon | ob=ane te Kriste:
987 -- uuas im an gilîcnissie | lungras fugles,
988 diurlîcara dûb=un | -- endi sat im uppan ûses drohtines ahslu,
989 uuonoda im ob=ar them uualdandes barne. | Aftar quam thar uuord fon himile,
990 hlûd fon them hôhon radura | en grôtta thane hêleand selb=on,
991 Crista, allaro cuningo bezton, | quað that he ina gicoranan habdi
992 selb=o fon sînun rîkea, | quað that im the sunu lîcodi
993 bezt allaro giboranaro manno, | quað that he im uuâri allaro barno liob=ost.
994 That môste Iohannes thô, | al sô it god uuelde,
995 gisehan endi gihôrean. | He gideda it sân aftar thiu
996 mannun mâri, | that sie thar mahtigna
997 hêrron habdun: | `thit is', quað he, `heb=encuninges sunu,
998 ên alouualdand: | thesas uuilleo ic urcundeo
999 uuesan an thesaro uueroldi, | huuand it sagda mi uuord godes,
1000 drohtines stemne, | thô he mi dôpean hêt
1001 uueros an uuatare, | sô huuar sô ic gisâhi uuârlîco
1002 thana hêlagon gêst | fan heb=anuuange
1003 an thesan middilgard | ênigan man uuaron,
1004 cuman mid craftu; | that quað, that scoldi Crist uuesan,
1005 diurlîc drohtines suno. | Hie dôpean scal
1006 an thana hêlagan gêst | endi hêlean managa
1007 manno mêndâdi. | He hab=ad maht fon gode,
1008 that he alâtan mag | liudeo gihuuilicun
1009 saca endi sundea. | Thit is selb=o Krist,
1010 godes êgan barn, | gumono bezto,
1011 friðu uuið fîundun. | Uuala that eu thes mag frâhmôd hugi
1012 uuesan an thesaro uueroldi, | thes eu the uuilleo gistôd,
1013 that gi sô libbeanda | thana landes uuard
1014 selb=on gisâhun. | Nu môt sliumo sundeono lôs
1015 manag gêst faran | an godes uuilleon
1016 tionon atômid, | the mid treuuon uuili
1017 uuið is uuini uuirkean | endi an uualdand Krist
1018 fasto gilôb=ean. | That scal te frumun uuerd=en
1019 gumono sô huuilicun, | sô that gerno dôt'.
[Fitt 13] [Fitt index]