[Back to Fitt 13]
Fitt 14
1121 Uuas im an them sinuueldi | sâlig barn godes
1122 lange huîle, | untthat im thô liob=ora uuarð,
1123 that he is craft mikil | cûðien uuolda
1124 uueroda te uuillion. | Thô forlêt he uualdes hlêo,
1125 ênôdies ard | endi sôhte im eft erlo gemang,
1126 mâri meginthiode | endi manno drôm,
1127 geng im thô bi Iordanes staðe: | thar ina Iohannes antfand,
1128 that friðubarn godes, | frôhan sînan,
1129 hêlagana heb=encuning, | endi them heliðun sagda,
1130 Iohannes is iungurun, | thô he ina gangan gesah:
1131 `thit is that lamb godes, | that thar lôsean scal
1132 af thesaro uuîdon uuerold | uurêða sundea,
1133 mancunneas mên, | mâri drohtin,
1134 cuningo craftigost.' | Krist im forð giuuêt
1135 an Galileo land, | godes êgan barn,
1136 fôr im te them friundun, | thar he afôdit uuas,
1137 tîrlîco atogan, | endi talda mid uuordun
1138 Krist undar is cunnie, | cuningo rîkeost,
1139 huuô sie scoldin iro selb=oro | sundea bôtean,
1140 hêt that sie im iro harmuuerc manag | hreuuan lêtin,
1141 feldin iro firindâdi: | `nu is it all gefullot sô,
1142 sô hîr alde man | êr huuanna sprâcun,
1143 gehêtun eu te helpu | heb=enrîki:
1144 nu is it giu ginâhid thurh thes neriandan craft: | thes môtun gi neotan forð,
1145 sô huue sô gerno uuili | gode theonogean,
1146 uuirkean aftar is uuilleon.' | Thô uuarð thes uuerodes filu,
1147 thero liudeo an lustun: | uurðun im thea lêra Cristes,
1148 sô suôtea them gisîðea. | He began im samnon thô
1149 gumono te iungoron, | gôdoro manno,
1150 uuordspâha uueros. | Geng im thô bi ênes uuatares staðe,
1151 thar thar habda Iordan | aneb=an Galileo land
1152 ênna sê geuuarhtan. | Thar he sittean fand
1153 Andreas endi Petrus | bi them ahastrôme,
1154 bêðea thea gebrôðar, | thar sie an brêd uuatar
1155 suuîðo niudlîco | netti thenidun,
1156 fiscodun im an them flôde. | Thar sie that friðubarn godes
1157 bi thes sêes staðe | selb=o grôtta,
1158 hêt that sie im folgodin, | quað that he im sô filu uuoldi
1159 godes rîkeas forgeb=en; | `al sô git hîr an Iordanes strôme
1160 fiscos fâhat, | sô sculun git noh firiho barn
1161 halon te incun handun, | that sie an heb=enrîki
1162 thurh inca lêra | lîðan môtin,
1163 faran folc manag.' | Thô uuard= frômôd hugi
1164 bêðiun them gibrôðrun: | antkendun that barn godes,
1165 liob=an hêrron: | forlêtun al saman
1166 Andreas endi Petrus, | sô huuat sô sie bi theru ahu habdun,
1167 geuunstes bi them uuatare: | uuas im uuilleo mikil,
1168 that sie mid them godes barne | gangan môstin,
1169 samad an is gisîðea, | scoldun sâliglîco
1170 lôn antfâhan: | sô dôt liudeo so huuilic,
1171 sô thes hêrran uuili | huldi githionon,
1172 geuuirkean is uuilleon. | Thô sie bi thes uuatares staðe
1173 furðor quâmun, | thô fundun sie thar ênna frôdan man
1174 sittean bi them sêuua | endi is suni tuuêne,
1175 Iacobus endi Iohannes: | uuârun im iunga man.
1176 Sâtun im thâ gesunfader | an ênumu sande uppen,
1177 brugdun endi bôttun | bêdium handun
1178 thiu netti niudlîco, | thea sie habdun nahtes êr
1179 forsliten an them sêuua. | Thar sprac im selb=o tô
1180 sâlig barn godes, | hêt that sie an thana sîð mid im,
1181 Iacobus endi Iohannes, | gengin bêðie,
1182 kindiunge man. | Thô uuârun im Kristes uuord
1183 sô uuird=ig an thesaro uueroldi, | that sie bi thes uuatares staðe
1184 iro aldan fader | ênna forlêtun,
1185 frôdan bi them flôde, | endi al that sie thar fehas êhtun,
1186 nettiu endi neglitskipu, | gecurun im thana neriandan Krist,
1187 hêlagna te hêrron, | uuas im is helpono tharf
1188 te githiononne: | sô is allaro thegno gehuuem,
1189 uuero an thesero uueroldi. | Thô giuuêt im the uualdandes sunu
1190 mid them fiuuariun forð, | endi im thô thana fîfton gicôs
1191 Krist an ênero côpstedi, | cuninges iungoron,
1192 môdspâhana man: | Mattheus uuas he hêtan,
1193 uuas im ambahteo | eðilero manno,
1194 scolda thar te is hêrron | handun antfâhan
1195 tins endi tolna; | treuua habda he gôda,
1196 âðalandbâri: | forlêt al saman
1197 gold endi silub=ar | endi geb=a managa,
1198 diurie mêðmos, | endi uuard= im ûses drohtines man;
1199 côs im the cuninges thegn | Crist te hêrran,
1200 milderan mêðomgeb=on, | than êr is mandrohtin
1201 uuâri an thesero uueroldi: | feng im uuôðera thing,
1202 langsamoron râd. | Thô uuarð it allun them liudiun cûð,
1203 fon allaro burgo gihuuem, | huuô that barn godes
1204 samnode gesîðos | endi selb=o gesprac
1205 sô manag uuîslîc uuord | endi uuâres sô filu,
1206 torhtes gitôgde | endi têcan manag
1207 geuuarhte an thesero uueroldi. | Uuas that an is uuordun scîn
1208 iac an is dâdiun sô same, | that he drohtin uuas,
1209 himilisc hêrro | endi te helpu quam
1210 an thesan middilgard | manno barnun,
1211a liudiun te thesun liohta. |
[Fitt 15]
[Fitt index]