[Back to Fitt 22]
Fitt 23
1915 Ne cumat thea alle te himile, | thea the hîr hrôpat te mi
1916 manno te mundburd. | Managa sind thero,
1917 thea uuilliad alloro dago gehuilikes | te drohtine hnîgan,
1918 hrôpad thar te helpu | endi huggead an ôðar,
1919 uuirkead uuamdâdi: | ne sind im than thiu uuord fruma,
1920 ac thea môtun huerb=an | an that himiles lioht,
1921 gangan an that godes rîki, | thea thes gerne sint,
1922 that sie hîr gefrummien | fader alauualdan
1923 uuerc endi uuilleon. | Thea ni thurb=un mid uuordun sô fîlu
1924 hrôpan te helpu, | huanda the hêlogo god
1925 uuêt alloro manno gehues | môdgethâhti,
1926 uuord endi uuilleon, | endi gildid im is uuerco lôn.
1927 Bethiu sculun gi sorgon, | than gi an thene sîð farad,
1928 huô gi that ârundi | ti endea bebrengen.
1929 Than gi lîðan sculun | aftar thesumu landskepea,
1930 uuîdo aftar thesoro uueroldi, | al sô iu uuegos lêdiad,
1931 brêd strâta te burg, | simbla sôkiad gi iu thene bezton sân
1932 man undar theru menegi | endi cûðead imu iuuuan môðseb=on
1933 uuârun uuordun. | Ef sie than thes uuirðige sint,
1934 that sie iuuua gôdun uuerc | gerno gelêstien
1935 mid hluttru hugi, | than gi an themu hûse mid im
1936 uuonod an uuilleon | endi im uuel lônod,
1937 geldad im mid gôdu | endi sie te gode selb=on
1938 uuordun geuuîhad | endi seggead im uuissan friðu,
1939 hêlaga helpa | heb=encuninges.
1940 Ef sie than sô sâliga | thurh iro selb=oro dâd
1941 uuerðan ni môtun, | that sie iuuua uuerc frummien,
1942 lêstien iuuua lêra, | than gi fan them liudiun sân,
1943 farad fan themu folke, | -- the iuuua friðu huuirb=id
1944 eft an iuuuoro selb=oro sîð, -- | endi lâtad sie mid sundiun forð,
1945 mid baluuuercun bûan | endi sôkiad iu burg ôðra,
1946 mikil manuuerod, | endi ne lâtad thes melmes uuiht
1947 folgan an iuuuom fôtun, | thanan the man iu antfâhan ne uuili,
1948 ac scuddiat it fan iuuuon scôhun, | that it im eft te scamu uuerðe,
1949 themu uuerode te geuuitskepie, | that iro uuillio ne dôg.
1950 Than seggeo ic iu te uuârun, | sô huan sô thius uuerold endiad
1951 endi the mâreo dag | ob=ar man farid,
1952 that than Sodomoburg, | thiu hîr thurh sundeon uuarð
1953 an afgrundi | êldes craftu,
1954 fiuru bifallen, | that thiu than hab=ad friðu mêran,
1955 mildiran mundburd, | than thea man êgin,
1956 the iu hîr uuiðaruuerpat | endi ne uuilliad iuuua uuord frummien.
1957 Sô hue sô iu than antfâhit | thurh ferhtan hugi,
1958 thurh mildean môd, | sô hab=ad mînan forð
1959 uuilleon geuuarhten | endi ôc uualdand god,
1960 antfangan fader iuuuan, | firiho drohtin,
1961 rîkean râdgeb=on, | thene the al reht bican.
1962 Uuêt uualdand self, | endi uuillean lônot
1963 gumono gehuilicumu, | sô huat sô hi hîr gôdes geduot,
1964 thoh hi thurh minnea godes | manno huilicumu
1965 uuilleandi fargeb=e | uuateres drinkan,
1966 that hi thurftigumu manne | thurst gehêlie,
1967 caldes brunnan. | Thesa quidi uuerðad uuâra,
1968 that eo ne bilîb=id, | ne hi thes lôn sculi,
1969 fora godes ôgun | geld antfâhan,
1970 mêda managfalde, | sô huat sô hi is thurh mîna minnea geduot.
1971 Sô hue sô mîn than farlôgnid | liudibarno,
1972 heliðo for thesoro heriu, | sô dôm ic is an himile sô self
1973 thar uppe far them alouualdan fader | endi for allumu is engilo crafte,
1974 far theru mikilon menigi. | Sô huilic sô than eft manno barno
1975 an thesoro uueroldi ne uuili | uuordun mîðan,
1976 ac gihit far gumskepi, | that he mîn iungoro sî,
1977 thene uuilliu ic eft ôgean | far ôgun godes,
1978 fora alloro firiho fader, | thar folc manag
1979 for thene alouualdon | alla gangad
1980 reðinon uuið thene rîkeon. | Thar uuilliu ic imu an reht uuesan
1981 mildi mundboro, | sô huemu sô mînun hîr
1982 uuordun hôrid | endi thiu uuerc frumid,
1983 thea ic hîr an thesumu berge uppan | geboden hebbiu.'
1984 Habda thô te uuârun | uualdandes sunu
1985 gelêrid thea liudi, | huô sie lof gode
1986 uuirkean scoldin. | Thô lêt hi that uuerod thanan
1987 an alloro halb=a gehuilica, | heriskepi manno
1988 sîðon te selðon. | Habdun selb=es uuord,
1989 gehôrid heb=encuninges | hêlaga lêra,
1990 sô eo te uueroldi sint | uuordo endi dâdeo,
1991 mancunnies manag | ob=ar thesan middilgard
1992 sprâcono thiu spâhiron, | sô hue sô thiu spel gefrang,
1993 thea thar an themu berge gesprac | barno rîkeast.
[Fitt 24]
[Fitt index]