[Back to Fitt 31]

Fitt 32

2621 Sô gifragn ik that thô selb=o | sunu drohtines,
2622 allaro barno bezt | biliðeo sagda,
2623 huilic thero uuâri | an uueroldrîkea
2624 undar heliðcunnie | himilrîkie gelîc;
2625 quað that oft luttiles huat | liohtora uurði,
2626 sô hôho afhuob=i, | `so duot himilrîki:
2627 that is simla mêra, | than is man ênig
2628 uuânie an thesaro uueroldi. | Ôk is imu that uuerk gelîc,
2629 that man an sêo innan | segina uuirpit,
2630 fisknet an flôd | endi fâhit bêðiu,
2631 ub=ile endi gôde, | tiuhid up te staðe,
2632 liðod sie te lande, | lisit aftar thiu
2633 thea gôdun an greote | endi lâtid thea ôðra eft an grund faran,
2634 an uuîdan uuâg. | Sô duod uualdand god
2635 an themu mâreon dage | menniscono barn:
2636 brengid irminthiod, | alle tesamne,
2637 lisit imu than thea hluttron | an heb=enrîki,
2638 lâtid thea fargriponon | an grund faren
2639 hellie fiures. | Ni uuêt heliðo man
2640 thes uuîties uuiðarlâga, | thes thar uueros thiggeat,
2641 an themu inferne | irminthioda.
2642 Than hald ni mag thera mêdan man | gimacon fîðen,
2643 ni thes uuelon ni thes uuilleon, | thes thar uualdand skerid,
2644 gildid god selb=o | gumono sô huilicumu,
2645 sô ina hêr gihaldid, | that he an heb=enrîki,
2646 an that langsame lioht | lîðan môti.'
2647 Sô lêrda he thô mid listiun. | Than fôrun thar thea liudi tô
2648 ob=ar al Galil&ae;o land | that godes barn sehan:
2649 dâdun it bi themu uundre, | huanen imu mahti sulic uuord cumen,
2650 sô spâhlîco gisprokan, | that he spel godes
2651 gio sô sôðlîco | seggean consti,
2652 sô craftiglîco giqueðen: | `he is theses kunnies hinen', quâðun sie,
2653 `the man thurh mâgskepi: | hêr is is môder mid ûs,
2654 uuîf undar thesumu uuerode. | Huat, uui the hêr uuitun alle,
2655 sô kûð is ûs is kuniburd | endi is knôsles gehuat;
2656 auuôhs al undar thesumu uuerode: | huanen scoldi imu sulic geuuit cuman,
2657 mêron mahti, | than hêr ôðra man êgin?'
2658 Sô farmunste ina that manno folc | endi sprâkun im gimêdlic uuord,
2659 farhogdun ina sô hêlagna, | hôrien ni uueldun
2660 is gibodskepies. | Ni he thar ôk biliðeo filu
2661 thurh iro ungilôb=on | ôgean ni uuelde,
2662 torhtero têcno, | huand he uuisse iro tuîflean hugi,
2663 iro uurêðan uuillean, | that ni uuârun uueros ôðra
2664 sô grimme under Iudeon, | sô uuârun umbi Galil&ae;o land,
2665 sô hardo gehugide: | sô thar uuas the hêlago Krist,
2666 giboren that barn godes, | si ni uueldun is gibodskepi thoh
2667 antfâhan ferhtlîco, | ac bigan that folc undar im,
2668 rincos râdan, | huô sie thene rîkeon Krist
2669 uuêgdin te uundron. | Hêtun thô iro uuerod cumen,
2670 gesîði tesamne: | sundea uueldun
2671 an thene godes sunu | gerno gitellien
2672 uurêðes uuilleon; | ni uuas im is uuordo niud,
2673 spâharo spello, | ac sie bigunnun sprekan undar im,
2674 huô sie ina sô craftagne | fan ênumu clib=e uurpin,
2675 ob=ar ênna berges uual: | uueldun that barn godes
2676 lib=u bilôsien. | Thô he imu mid them liudiun samad
2677 frôlîco fôr: | ni uuas imu foraht hugi,
2678 -- uuisse that imu ni mahtun | menniscono barn,
2679 bi theru godcundi | Iudeo liudi
2680 êr is tîdiun uuiht | teonon gifrummien,
2681 lêðaro gilêsto --, | ac he imu mid them liudiun samad
2682 stêg uppen thene stênholm, | antthat sie te theru stedi quâmun,
2683 thar sie ine fan themu uualle niðer | uuerpen hugdun,
2684 fellien te foldu, | that he uurði is ferhes lôs,
2685 is aldres at endie. | Thô uuarð thero erlo hugi,
2686 an themu berge uppen | bittra githâhti
2687 Iuðeono tegangen, | that iro ênig ni habde sô grimmon seb=on
2688 ni sô uurêðen uuilleon, | that sie mahtin thene uualdandes sunu,
2689 Krist antkennien; | he ni uuas iro cûð ênigumu,
2690 that sie ina thô undaruuissin. | Sô mahte he undar ira uuerode standen
2691 endi an iro gimange | middiumu gangen,
2692 faren undar iro folke. | He dede imu thene friðu selb=o,
2693 mundburd uuið theru menegi | endi giuuêt imu thurh middi thanan
2694 thes fîundo folkes, | fôr imu thô, thar he uuelde,
2695 an êne uuôstunnie | uualdandes sunu,
2696 cuningo craftigost: | habde thero custes giuuald,
2697 huar imu an themu lande | leob=ost uuâri
2698a te uuesanne an thesaru uueroldi. |
[Fitt 33] [Fitt index]