[Back to Fitt 66]

Fitt 67

5621 Thuo uuarð thar an middian dag | mahtig têcan,
5622 uuundarlîc giuuaraht | ob=ar thesan uuerold allan
5623 thuo man thena godes suno | an thena galgon huof,
5624 Crist an that crûci: | thuo uuarð it cûð ob=ar all,
5625 huô thiu sunna uuarð gisuorkan: | ni mahta suigli lioht
5626 scôni giscînan, | ac sia scado farfeng,
5627 thimm endi thiustri | endi sô githrusmod neb=al.
5628 Uuarð allaro dago druob=ost, | duncar suîðo
5629 ob=ar thesan uuîdun uueruld, | sô lango sô uualdand Crist
5630 qual an themo crucie, | cuningo rîhost,
5631 ant nuon dages. | Thuo thie neb=al tiscrêd,
5632 that gisuerc uuarð thuo tesuungan, | bigan sunnun lioht
5633 hêdron an himile. | Thuo hreop up te gode
5634 allaro cuningo craftigost, | thuo hie an themo crucie stuod
5635 faðmon gifastnot: | `fader alomahtig,' quathie,
5636 'te huî thu mik sô farlieti, | lieb=o drohtin,
5637 hêlag heb=ancuning, | endi thîna helpa dedos,
5638 fullisti sô ferr? | Ik standu under theson fîondon hier
5639 uundron giuuêgid.' | Uerod Iudeono
5640 hlôgun is im thuo te hosce: | gihôrdun thena hêlagun Crist,
5641 drohtin furi them dôd=e | drincan biddian,
5642 quað that ina thurstidi. | Thiu thioda ne latta,
5643 uurêða uuiðarsacon: | uuas im uuilleo mikil,
5644 huat sia im bittres tuo | bringan mahtin.
5645 Habdun im unsuôti | ecid endi galla
5646 gimengid thia mênhuaton; | stuod ên mann garo,
5647 suîðo sculdig scaðo, | thena habdun sia giscerid te thiu,
5648 farspanan mid sprâcon, | that hie sia en êna spunsia nam,
5649 lîðo thes lêðosten, | druog it an ênon langan scafte,
5650 gibundan an ênon bôme | endi deda it them barne godes,
5651 mahtigon te mûðe. | Hie ankenda iro mirkiun dâdi,
5652 gifuolda iro fêgnes: | furðor ni uuelda
5653 is sô bittres anbîtan, | ac hreop that barn godes
5654 hlûdo te them himiliscon fader: | `ik an thina hendi befilhu,' quathie,
5655 `mînon gêst an godes uuillion; | hie ist nu garo te thiu,
5656 fûs te faranne.' | Firiho drohtin
5657 gihnêgida thuo is hôb=id, | hêlagon âðom
5658 liet fan themo lîkhamen. | Sô thuo thie landes uuard
5659 sualt an them sîmon, | sô uuarð sân after thiu
5660 uundartêcan giuuaraht, | that thar uualdandes dôd=
5661 unqueðandes sô filo | antkennian scolda,
5662 thiadnes êndagon: | erða bib=oda,
5663 hrisidun thia hôhun bergos, | harda stênos club=un,
5664 felisos after them felde, | endi that fêha lacan tebrast
5665 an middion an tuê, | that êr managan dag
5666 an themo uuîhe innan | uuundron gistriunid
5667 hêl hangoda | -- ni muostun heliðo barn,
5668 thia liudi scauuon, | huat under themo lacane uuas
5669 hêlages behangan: | thuo mohtun an that horð sehan
5670 Iudeo liudi -- | grab=u uuurðun giopanod
5671 dôdero manno, | endi sia thuru drohtines craft
5672 an iro lîchamon | libbiandi astuodun
5673 up fan erðu | endi uurðun giôgida thar
5674 mannon te mârðu. | That uuas sô mahtig thing,
5675 that thar Cristes dôð | antkennian scoldun,
5676 sô filo thes gifuolian, | thie gio mid firihon ne sprac
5677 uuord an thesaro uueroldi. | Uuerod Iudeono
5678 sâuuun seldlîc thing, | ac uuas im iro slîði hugi
5679 sô farhardod an iro herten, | that thar io sô hêlag ni uuarð
5680 têcan gitôgid, | that sia trûodin thiu bat
5681 an thia Cristes craft, | that hie cuning ob=ar all,
5682 thes uuerodes uuâri. | Suma sia thar mid iro uuordon gisprâcun,
5683 thia thes hrêuues thar | huodian scoldun,
5684 that that uuâri te uuâren | uualdandes suno,
5685 godes gegnungo, | that thar an them galgon sualt,
5686 barno that besta. | Slôgun an iro briost filo
5687 uuôpiandero uuîb=o: | uuas im thiu uuunderquâla
5688 harm an iro herten | endi iro hêrren dôð
5689 suîðo an sorogon. | Than uuas sido Iudeono,
5690 that sia thia haftun thuru thena hêlagon dag | hangon ni lietin
5691 lengerun huîla, | than im that lîf scriði,
5692 thiu seola besunki: | slîðmuoda mann
5693 gengun im mid nîðscipiu nâhor, | thar sô beneglida stuodun
5694 theob=os tuêna, | tholodun bêðia
5695 quâla bi Criste: | uuârun im quica noh than,
5696 untthat sia thia grimmun | Iudeo liudi
5697 bênon bebrâcon, | that sia bêðia samad
5698 lîf farlietun, | suohtun im lioht ôðer.
5699 Sia ni thorftun drohtin Crist | dôðes bêdian
5700 furðor mid ênigon firinon: | fundun ina gifaranan thuo iu:
5701 is seola uuas gisendid | an suoðan uueg,
5702 an langsam lioht, | is liði cuolodun,
5703 that ferah uuas af them flêske. | Thuo geng im ên thero fîondo tuo
5704 an nîðhugi, | druog negilid sper
5705 hard an is handon, | mid heruthrummeon stac,
5706 liet uuâpnes ord | uuundum snîðan,
5707 that an selb=es uuarð | sîdu Cristes
5708 antlocan is lîchamo. | Thia liudi gisâuun,
5709 that thanan bluod endi uuater | bêðiu sprungun,
5710 uuellun fan thero uuundun, | all sô is uuillio geng
5711 endi hie habda gimarcod êr | manno cunnie,
5712 firiho barnon te frumu: | thuo uuas it all gifullid sô.
[Fitt 68] [Fitt index]